काठमाडौं, १८ साउन – ऊर्जा, जलस्रोत तथा सिँचाइमन्त्री फम्फा भुसालले डलरमा खरिद गर्नुपर्ने एलपी ग्यास विस्थापित गरी विद्युत् खपत गर्ने अभियानमा सघाउन अपिल गरेकी छिन्।
ललितपुर महानगरपालिका–३ मा सोमबार आयोजित विद्युतीय गाडी र विवेकशील बत्ती शुभारम्भ गर्ने कार्यक्रममा उर्जामन्त्री भुसालले ललितपुरका जनतालाई विद्युतीय सामग्री प्रयोग गर्न आग्रह गरेकी हुन्।
मन्त्री भुसालले एल्पी ग्यासलाई विस्थापित गर्ने गरी विद्युत्को उपभोग गर्नुपर्नेमा जोड दिँदै भनिन्, ‘बिजुलीको चुलोमा खाना पकाउन सबैलाई आग्रह गर्न चाहन्छु।’
आफूले विद्युत् महसुल दर घटाउने नीति सार्वजनिक गर्न लागेको जानकारी दिँदै भुसालले भनिन्, ‘घरेलु उपभोगमा प्रयोग हुने विद्युत् महसुल दर कम गर्नेछु, केही दिनमा त्यस विषयमा निर्णय गर्नेछु।’
भान्सादेखि सवारीसाधनसम्म विद्युतीय ऊर्जा प्रयोग गर्न अपिल गर्दै मन्त्री भुसालले भनिन्, ‘हाम्रो देशको पैसा हाम्रै देशमा खर्च गर्न लागौँ, त्यसले मात्रै व्यापारघाटा कम गर्न सहयोग गर्छ।’
आफूले आधारभूत जनतालाई निःशुल्क विद्युत् उपलब्ध गराउने नीति ल्याउन लागेको उर्जामन्त्री भुसालले जानकारी दिएकी छिन्।
सिंहदरबारको अधिकार घरदैलोमा भन्ने नारा दिएर तीन तहको सरकारको व्यवस्था गरिएको स्मरण गर्दै भुसालले वडा नं ३ ले समाजका सबै क्षेत्र वर्ग र समुदायलाई आफ्नो उत्कृष्ट प्रशासनिक, सेवा र सुविधा दिन सफल भएको बताएकी छिन्।
कार्यक्रममा वडाध्यक्ष श्रीगोपाल महर्जनले स्वास्थ्य चौकी व्यवस्थित गरेको, वडावासीका लागि निःशुल्क विद्युतीय गाडीको सेवा उपलब्ध गराएको र ज्येष्ठ नागरिकलाई घरमै स्वास्थ्य सेवा उपलब्ध गराएको बताएका छन्।
कार्यक्रमा मन्त्री भुसालले विवेकशील बत्ती सार्वजनिक गर्नाका साथै विद्युतीय गाडीको शुभारम्भ गरेकी छिन्।
रमेश खरेलकाे राजनीतिक यात्रा अब कसरी? (अन्तरवार्ता)
प्रतिक्रिया