काठमाडौं– १३ औं दक्षिण एसियाली खेलकुद (साग) अन्तर्गत पुरुष क्रिकेटमा नेपाली टोली श्रीलंकासँग पराजित भएको छ।
कीर्तिपुर स्थित त्रिभुवन विश्वविद्यालयको मैदानमा मंगलबार भएको खेलमा नेपाली टोली श्रीलंकाको यु–२३ टोलीसँग ६ विकेटले पराजित भएको हो। घरेलु टोलीले पहिले ब्याटिङ गर्दै दिएको १ सय ७३ रनको लक्ष्य पाहुना टोली श्रीलंकाले १९.१ ओभमा मात्र ४ विकेट गुमाएर भेटाउन सफल भएको हो।
लक्ष्य पछ्याउने क्रममा श्रीलंकाले पहिलो ३ विकेट ४९ रनमा गुमाएको थियो। आक्रामक ब्याटिंग गरेका ओपनर पाथुम निस्संका ३० रन बनाएर सोमपाल कामिबाट आउट भए पछि लगातार विकेट गुमेको थियो। पाथुमले १२ बलमा ३ चौका र २ छक्का प्रहार गरे। त्यसपछि कामिन्दु मेन्डिस १ रन, चरिथ असलंका ६ रन बनाएर आउट भएका थिए।
तेश्रो विकेटको लागि निशान फर्नान्डो र शम्मु अशानले ९१ रनको साझेदारी गर्दै श्रीलंकालाई बलियो स्थितिमा पु¥याएका थिए। ४२ बलमा ५ चौका र १ छक्का मदतले ४६ रन बनाएका फर्नान्डोलाई पवन सर्राफले १७ औं ओभरमा क्याच आउट गराएका थिए। श्रीलंकाका लागि उत्कृष्ट इनिंग खेलेका अशानले अविजित ७२ रन बनाउ। अशानले ४४ बलमा ४ चौका र ५ छक्का प्रहार गरे। अशेन बान्डाराले अविजित १४ रन बनाउँदा १ चौका र १ छक्का प्रहार गरे।
बलिङतर्फ नेपालका पवन सर्राफले सर्वाधिक २ विकेट हात पार्दा सोमपाल कामी र सुशन भारीले समान १/१ विकेट लिए।
यस अघि खेलमा टस हारेर ब्याटिंग गरेको नेपालले निर्धारित २० ओभरमा ५ विकेट गुमाएर १ सय ७२ रनको योगफल बनाएको थियो। नेपालको लागि दिपेन्द्र ऐरीले सर्वाधिक ७२ रन बनाए। ४४ बल खेलेका दीपेन्द्रले ४ चौका र ३ छक्का प्रहार गरे। पवन सर्राफले २२, बिनोद भण्डारी र ज्ञानेन्द्र मल्ल समान २१ रन तथा आरिफ शेखले १९ रन बनाएका थिए।
नेपालको सुरुवात राम्रो हुन सकेको थिएन। १ रन बनाएका पारस खड्का दोश्रो ओभरमा कभिस्का अन्जुलाबाट विकेटकिपरबाट क्याच आउट भएका थिए। त्यसपछि आरिफ शेख १९ तथा ज्ञानेन्द्र मल्ल २१ रन बनाएर पवेलियन फर्किएका थिए।
चौथो विकेटको लागि दिपेन्द्र ऐरी र बिनोद भण्डारीले अर्धशतकीय साझेदारी गरे। ५६ रनको साझेदारी गरे पछि बिनोद २१ रनमा बोल्ड भए। पाँचौ विकेटका लागि दिपेन्द्रले पवनसंग ६२ रनको साझेदारी गरे।
प्रतिक्रिया