काठमाडौं, वैशाख २२ – महानगरीय प्रहरी परिसर काठमाडौंले १४ वर्षीया बालिकालाई बलात्कार गरेको आरोपमा एक शिक्षकलाई पक्राउ गरेको छ। पक्राउ पर्नेमा दोलखा भीमेश्वर नगरपालिका–९ घर भएका २९ वर्षीय शम्भु लामा रहेका छन्।
लामाले आफ्नै विद्यार्थीलाई गोरखाबाट काठमाडौं ल्याएर सुन्धाराको होटलमा राखी बलात्कार गरेको प्रहरीले जानकारी दिएको छ। लामा गोरखाको विद्यायलयमा पढाउने शिक्षक हुन्। उनी काठमाडौंको पुतलीसडकमा बस्ने गरेका थिए। लामाले विद्यार्थीलाई फकाएर काठमाडौं ल्याएको र जबरजस्ती करणी गरेको प्रहरीले बताएको छ।
जबरजस्ती करणी गरेको सूचनाका आधारमा खटिएको प्रहरीले लामालाई मंगलबार बानेश्वरबाट पक्राउ गरेको हो। उनलाई भाग्दै गरेको अवस्थामा नियन्त्रणमा लिएको र घटनाबारे आवश्यक अनुसन्धान भइरहेको प्रहरीले जानकारी दिएको छ।
प्रतिक्रिया