काठमाडौं । सञ्चार तथा सूचना प्रविधिमन्त्री गोकुल बास्कोटाले राजीनामा दिएका छन् ।
सेक्युरिटी प्रिन्टिङ प्रेस खरिदमा स्वीस कम्पनीका एजेन्टसँग ७० करोड कमिसनका लागि कुराकानी भएको अडियो सार्वजनिक भएपछि बास्कोटाले राजीनामा दिएका हुन् ।
बास्कोटाले राजीनामा दिएको जानकारी सभामुख अग्नि सापकोटाले संसदमा दिएका हुन् ।
प्रमुख विपक्षी नेपाली कांग्रेसले सञ्चारमन्त्री बास्कोटालाई बर्खास्त गर्न मा गर्दै बिहीबार संसद अवरुद्ध गरेको थियो ।
त्यसक्रममा सभामुख सापकोटाले सञ्चारमन्त्रीले राजीनामा दिएको अनौपचारिक जानकारी आएको बताए । उनले भने, ‘औपचारिक पत्र त आउने नै छ । मलाई अनौपचारिक रुपमा जानकारी भएअनुसार सम्बन्धित मन्त्रीले राजीनामा दिइसक्नु भएको छ । र, सरकारको ध्यानाकर्षण पनि भइसकेको छ ।’
त्यसको पुष्टि गर्दै बास्कोटाले पनि नैतिकताका आधारमा राजीनामा दिएको बताएका छन् । ‘मेरो बारेमा प्रश्न उठेकाले सम्मानीय प्रधानमन्त्रीज्यू समक्ष नैतिकताको आधारमा मन्त्री पदबाट राजीनामा दिएको जानकारी गराउँछु’ उनले ट्वीट गरेका छन् ।
के हो अडियो प्रकरण ?
सेक्युरिटी प्रिन्टिङ प्रेस खरिद प्रक्रिया अगाडि बढाएसँगै बास्कोटा विवादमा तानिएका थिए । तर मन्त्रिपरिषद्ले जीटुजीमा सेक्युरिटी प्रिन्टिङ प्रेस खरिद गर्ने निर्णय गर्दै फ्रान्स वा जर्मन मध्ये ऐन नियमअनुसार उपयुक्त प्रस्ताव रोज्न बास्कोटालाई नै दियो ।
स्वीस कम्पनी यो रेसबाट बाहिरियो । संसदको सार्वजनिक लेखा समितिमा पनि यसबारे उजुरी पर्यो ।
बिहीबार सेक्युरिटी प्रिन्टिङ प्रेसबारे छलफल गर्न समितिको बैठक बोलाइएको थियो । त्यसको अघिल्लो दिन बास्कोटा र स्वीस कम्पनीका एजेन्ट विजय मिश्रबीच कमिसनबारे कुराकानीको अडियो लिक भएको हो ।
प्रतिक्रिया